حرقوا البلد وقلبوها فوقاني تحتاني

كتب الدكتور / احمد هشام حلس *

عارفين ايش الي بيقهر الواحد وبيكسر خاطره، اه والله، انو في نفس الوقت الي كنا فيه بنبني وبنطور وبنعمر في غزة بكل حب وشغف وطاقة ايجابية، كان في ناس تانية بتخطط وبتحضر بكل مكر ودهاء وغباء وتخلف فوق الارض وتحت الارض وفي جنح الظلام لتدمير وحرق وتخريب كل اشي على روسنا وروس اهالينا، بدون اي خطة او رؤية او ضمانات او استراتيجيات حقيقية مضمونة او بعد نظر او حتى قصر نظر، هدا اذا كان في عندهم نظر اصلا،،، كم كنا مغفلين، كم كنا حمقى وبسطاء بتفكيرنا الطيب العبيط والاهبل، تفكير معتوه عايز يعيش بسلام ويبني ويشتغل بدون موت ودمار، تفكير معوق للاسف، قال حافظ على البيئة، شوفوا الهبل، بدي احافظ على البيئة من التلوث، شايفين هالمسخرة، في مشاريع تانية ارقى واهم احنا كجهلة مستحيل نفهمها بتفكيرنا القاصر والعقيم.... اخ هما بس لوأنهم حكولنا زي ما حكوا لحماد وابو زهري وهنية وغازي والنونو ،، لوأنهم خبرونا زي ما خبروا جماعتهم، كان رحنا على اي بلد تحترمنا وتخاف علينا وعلى اولادنا.....قال تدريبات قال، ومحاضرات ومبادرات ومشاريع وورش عمل وشغل ليل ونهار، تطوير وتنمية، قال تنمية مستدامة واعادة تدوير النفايات الصلبة والتغير المناخي والاقتصاد الاخضر ههههههههه، بالزمة هادي مواضيع ينحكى فيها، قال بدنا نبني الانسان والبلد ونصنع نموذج فخم زي الي كنا نشوفه في اوروبا وامريكا، وكل مشروع كان يخلص على خير نعمل بعديه حفلة ختام في مطعم محترم وتكريم لكل الفريق ونبلش انخطط للمشروع الي بعده، ونعمل مبادرات لتنظيف المينا والبحر من الفاين وعلب الكولا، شايفين قديش كنا اغبياء، بنعمل حملات نضافة لشوارع عدها راح تتجرف، وبنوعي ناس عدهم راح يموتوا، بنشتغل في بلد قادتها بيخططوا لزجها واقحامها في مغامرة ومعركة اي اهبل في جنوب موزمبيق عارف نتائجها بكل ثقة مع عدو متغطرس حاقد فاجر قادر معاه كل العالم حتى العرب والمسلمين، فحرقوا البلد وقلبوها فوقاني تحتاني.... خراب في خراب في خراب، لمليون سنة الخراب الي صار فيها، وبتحكولي هدي يا دكتور وطول روحك..... حسبي الله ونعم الوكيل...

*مواطن اصيل من غزة