زياد .. اسمك بأرض الوطن جبل

بمناسبة  استشهاد المناضل  القائد الوزير زياد ابو عين ..هذه الكلمات التي اردناها طبيعية عفوية تلقائية ، ليست مسطورة أو موزونة على  بحور الشعر ، وانما كما تربة الأرض التي عشقها زياد ابو عين ، كلمات تشبه عفويته المنظمة ، وعشقه الطبيعي ألأزلي ..فلعل روحك تقرأنا وتسمعنا  ونحن نناجيها :

سلام  يا زياد

خبّرنا بعد ما حَرَقت الصواعد والنوازل

خبرنا .. يا ابو طارق

كيف شايف الوطن من السما

 بعد ما رَسَمت بغرسة الزيتون دويرة للزمان

 خبرنا كيف الختيار ابو عمار

كيف الخليل ابو جهاد

كيف الصلاح ابو اياد

والكمالين

كيف الحكيم والرفاق

خبرنا يا زياد

انهم مشتاقين لنصر فلسطيني

مرسوم بعيون صبية

ضفايرها متل شروش السنديان

عشقت الارض ... والأرض عشقتها

صلت للسما...والسما حبتها

صبيتنا يا زياد عينيها بلون الزعتر

بماء الورد معطرة

بالصليب والهلال مشنشلة

تغني للدني نشيد الفدائي

تيسمع العالم صدى السلام

احنا راح نخبرك اليوم يا زياد

انو زيتونتك المباركة

اللي  اصلها بهالأرض

 وفرعها بالسماء ..عما تضوي .. مش بس تكاد

عما تضوي .. دون ما يمس زيتها نار

عما تنور دروب الصبايا والشباب ...

صبايا وشباب ..اللي بيمينهم حجر وبيسارهم كتاب

ماشيين عدروب الحرية

احرار راح يوصلوا اكيد

الصبح قرب

بهمتهم يا زياد

بهمتهم يا زياد وهاماتكم ياشهدا

راح يرفعوا مع المحمود ابو مازن للوطن تيجان

ابو طارق اسمك الفلسطيني بترمسعيا صار جبل

لاجرافة محتل بتشيلو

ولا حتى لو كان زلزال

ابو طارق اطمن

انت هناك ... روحك هون

سلام يا اخي

احنا وانت للأبد هون باقيين .. بهالوطن

هن الغزاة ..اللي متل ما اجو غربا راح يرحلوا

ميلاد مجيد يازياد

اسمك صخر

اسمك جبل

اسمك بكل حبة تراب

ذاكرتها دهب لماع ما بتعرف النسيان

اسمك على كل ورقة

من كل غصن زيتون

اسمك شهيد

اسمك وزير

اسمك بطل .